Fagforbundet krev lønnssolidaritet
– Vi kan ikkje lage ein lønnsstruktur som gjer at nokon systematisk stikk av i lønnsutviklinga, seier leiar i Fagforbundet, Mette Nord, til NTB om Unios krav i lønnsoppgjeret.
14.04.2016
av
Informasjonsavdelinga
Sist oppdatert: 14.04.2016
Fagforbundet går til kamp mot veksten i leiarlønningane i kommunane og seier Unios krav om eiga lønnsdanning for høgt utdanna er usolidarisk. Både kommunanes interesseorganisasjon KS og alle arbeidstakarorganisasjonane er einige om at det ikkje er så mykje pengar å forhandle om i dette oppgjeret. Fordelinga mellom ulike grupper av kommuneansatte kan by på utfordringar.
Se Fagbladet-sak: Knallhard kamp om fordelingen
Bryt med solidarisk prinsipp
Fagforbundet meiner Unios krav om eit eige lønnskapittel for høgt utdanna kommunetilsette, som lærarar, sjukepleiarar og barnehagelærarar, vil bryte med dagens solidariske prinsipp innan lønnsdanninga i offentleg sektor.
– Kommunesektoren har eit eige ansvar for å sikre ei lønnsutvikling som òg bidreg til å løfte alle. Ved å lage ei eiga gruppe for desse, bryt ein med det solidariske prinsippet og den norske modellen med små lønnsforskjellar. Vi må sikre at dei utan formell kompetanse, som har låg lønn i utgangspunktet, òg får ta del i den økonomiske utviklinga i landet, seier Mette Nord.